2024 жылғы су тасқыны соңғы отыз жылдағы ең ауқымды табиғи апат болды. 2012 және 2017 жылдардағы апаттармен салыстырғанда, бұл тасқын көлемі жағынан әлдеқайда асып түсті. Табиғи апат елімізге үлкен залал келтіріп, шамамен 100 мыңға жуық адам эвакуацияланды.
Осындай ауқымды апат кезінде су тасқынынан зардап шеккен өңірлердің инфрақұрылымының беріктігі мен қауіпсіздігін қамтамасыз ету басты міндеттердің біріне айналды. Осы орайда, «KAP Logistics» ЖШС қалпына келтіру жұмыстарына белсенді араласып, өңірдің инфрақұрылымын күшейтуге және табиғи қауіп-қатерлерге қарсы тұру қабілетін арттыруға өз үлесін қосты.
Компанияның маңызды қадамдарының бірі – Түркістан облысы Созақ ауданы Жуантөбе ауылындағы технологиялық жол бойындағы бөгетті нығайту жобасына қатысуы болды. Аталған жұмыс аудан әкімдігімен бірлесе отырып жүзеге асырылып, көктемгі қар еруі мен нөсер жауын кезіндегі ықтимал су тасқыны қаупінің алдын алуға және қорғаныс қабілетін арттыруға бағытталды.
Бөгетті нығайту жобасы жергілікті халықтың қауіпсіздігін, сондай-ақ көлік-логистика инфрақұрылымының тұрақты жұмысын қамтамасыз етуге бағытталған. Себебі мұндай табиғи қатерлер кезінде бөгеттің бұзылуы өңір үшін ауыр зардаптарға әкелуі мүмкін.
Жүргізілген жұмыстар аясында бөгетті бекіту және оның бұзылуына жол бермеу мақсатында түрлі төтенше жағдайлар сценарийі мұқият пысықталды. Бұл жоба халық пен инфрақұрылым қауіпсіздігін қамтамасыз етудегі маңызды қадам болып саналады және өңірдегі барлық жүйелердің тұрақты жұмыс істеуіне септігін тигізеді.
«KAP Logistics» ЖШС жергілікті билікпен тығыз байланыста жұмыс істеп, өңір инфрақұрылымын дамыту мен қорғауға айрықша назар аударады. Компания логистикалық тізбектердің үздіксіз жұмыс істеуі үшін сенімді жағдай жасауға мән беріп, халықтың қауіпсіздігімен қатар көлік жүйесінің тиімділігін қамтамасыз етуді басты міндет санайды.
Жуантөбе ауылында атқарылған инфрақұрылымды нығайту жұмыстары компанияның өңірдің табиғи апаттарға төзімділігін арттыруға деген берік ұстанымын және қиын сәттерде көмек көрсетуге әрдайым дайын екенін айқын көрсетеді.