19 наурыз күні Қазақстанда жаңғыру мен табиғатқа жанашырлықты білдіретін «Наурызнама» онкүндігі аясында «Жаңару» күні аталып өтті. Өзгерістер мен өсудің рухына толы осы күні «KAP Logistics» ЖШС филиалдарының жұмыскерлері экологиялық акцияға белсене қатысып, ағаш көшеттерін отырғызды.

«Жаңару» күні өзгерістерге деген ұмтылысты ғана емес, сонымен қатар әр адамның өмірінде де, қоршаған әлемде де жаңарудың қажеттілігін білдіреді. Бұл күн – адамдар ой тазалығына мән беріп, аумақтарды көгалдандырып, табиғатты қорғауға арналған игі бастамаларды жүзеге асыратын ерекше күн.

Табиғатты қорғаудың маңыздылығын терең түсінген «KAP Logistics» ЖШС бұл жалпыұлттық мерекеден тыс қалмады. «Шиелі-Сұңқар» және «ОАТБ» филиалдарының қызметкерлері өз өңірлерінде ағаш отырғызу жұмыстарын ұйымдастырды. Акция аясында сенбілік өткізіліп, 3 тонна қоқыс шығарылып, Шиелі және Сызақ елді мекендерінде арша, шырша, қарағаш және тал сынды 770 түп ағаш көшеттері отырғызылды.

Бұл шара – Қазақстан Республикасы Президентінің елдегі экологиялық ахуалды жақсарту жөніндегі тапсырмасын орындауға қосқан елеулі үлес болды. Компанияның бұл әрекеті қоршаған ортаны қорғау мен экологиялық тұрақтылықты арттыруға бағытталған мемлекеттік бастамалармен үндеседі.