2018 жылы «СКК-Шиелі» филиалына арнап Шиелі кентінің сыртында орналасқан жүкті ауыстырып тиеу базасы сатып алынған болатын. База аумағында өсімдіктер аздығына байланысты қызметкерлер ландшафтық дизайн элементтерін қолдана отырып, көгалдандыру жұмыстарына кірісті.

Әкімшілік-тұрмыстық ғимаратпен іргелес жатқан жер телімдерінде туя мен шырша сияқты мәңгі жасыл ағаштар отырғызылып, қолдан жасалған гүлзарларға түрлі сұрыптағы раушан гүлдері егілген соң-ақ аула іші құлпырып шыға келді. Климаттық ерекшеліктерді ескере отырып, таңдап алынған қарағаш, терек пен мәжнүнтал ағаштары жергілікті жағдайға әбден бейімделген. Осылайша жасыл желекке малынған база аумағы көрген көзді қуантарлықтай түрленіп, мұнда еңбек ететіндердің көңіл-күйлеріне оң әсер ете бастаған.

Аумақты абаттандыру қызметкерлердің тиімділігі мен жұмысқа қабілеттілігін арттыратындығын байқаған басшылық көгалдандыру жұмыстарын одан әрі жалғастыруға ниетті.